Matthew 11
E Jon Tövapupui To Vanö A Ma Vamomhë Peß Manuh Pe Ieesuß
Luk 7:18-35
1E Ieesuß to soe vahik ken pa havun me ra poa vamomhë peß pa soe neß to vavaasis non rapoë. Pareß këh en pa ö neß to teß non, ko nö en pa ma vöön va pa muhin va Galiliß pa vavaasis me a vatvus a soe vih peß manih pa ma napan.2Manih po poen pamëh ne Jon Tövapupui to teß avoeß e non pa nohnoh, pareß tënan na a soe va pa ma kiu ne Ieesuß to nonok non, eß to vanö en pa ma pah vamomhë peß manuh pe Ieesuß. Kee hi poë pan. 3“Eën pöß kove vëh a teß to se voh nö maß, keß, emöm se anoeh nem ta meh teß eh?” 4Ke Ieesuß piun a soe pee, pareß soe ke rapoë pan, “Eöm pom se nö hah na manuh pe Jon, paröm soe vanat eah a ma taneah nöm to pënton, paröm ep in. 5Eöm se soe vanat eah pan, ‘O teß kekehoß to opoep hah ee. Me o teß varih o hathat ma moe to nö vavavih hah ee. Ko teß varih to teß me ne a mët töpaß, a ma sioniire to voon hah ee. Ko teß papön tenë, tëtënan vavih hah ee. Ko teß mët, toßtoß hah ee, ko teß arus pënton ee pa Soe Vih pe Sosoenën. 6Ko teß varih to vaman a ne neoß, me pa ma tah nöß to nonok noß, ee se nat ne haraß vahat ne, ee se vaeö, suk e Sosoenën se tapui en pee.’”
7A ma vamomhë pe Jon Tövapupui to nönö hah ko ne, ke Ieesuß taneo en pa vahutët ke ra napan a ma taateß pe Jon. Pareß soe rapoë pan, “Eöm nö voh nös pa moeh upin pa ep ataeah? A mëto no a tuvuh to taata non, ha? 8Keß, eöm to nö voh nös ko ep in pa ta teß to ohop non o ohop matan vavih ih? Ahik. A napan to ohop ne a ma ohop ep vavih to teß ne sih pa iuun pa teß sunön. 9Keß, eöm nö poß voh nös pa ep in ataeah, eöm to nö pöß voh nös pa ep a teß vanënën soe, ha? A, eöß to soe vaman rakah keoß peöm, a teß vanënën soe vëh e Jon, no a tasun peß to apuh oah e non pa ma teß tasun po upöm teß vanënën soe. 10Ke Jon ko pamëh no a soe to takiun suk voh manih po Puk pe Sosoenën to soe non pan,
“Pënton ah,
eöß se vanö nös a teß vëh se teß vovoh nös a soe peöß manem pën,
eß se vovoh ka oah,
pareß vamatop a hanan pën.” a
“Manih pa moeh upin no a pah teß to vavaoe no maß pan,
‘Vamatop öm a hanan pe Sunön,
paröm vatotoopin a ma hanan peß.’” b
11“Eöß to soe vaman rakah keoß peöm, e Jon Tövapupui no tasun peß to teß oah e non pa ma teß tasun po upöm teß manih po oeh. Ivëhkëk, a teß to teß va non manih pa siß koaß soneß manih pa Matop Vih va pa Vöön va Kin no a tasun peß to apuh oah e non pa teß tasun pe Jon. 12“Taneo non maß po poen ne Jon to vavatvus non a soe peß, pareß öök non maß manih kuru, a nap peo rakah to kehkeh hop ne manih pa Matop Vih va pa Vöön va Kin, vamanih pa napan to totoon ne o hopaß to hop manih pa Matop Vih va pa Vöön va Kin. 13O Vavaasis po Teß Vanënën Soe, me o teß Vavaasis pe Mosës to vavatvus voh i ne a soe pe Sosoenën keß öök maß po poen ne sinan e Jon to vahuh poan. 14Eöm se iu pënton nem a soe, eöm se pënton. O Puk pe Sosoenën to soe non pan a teß vanënën soe vëh e Elaëjaß se nö maß. O puk pamëh to hikta sosoe voh non pan e Elaëjaß koman ivëh se nö maß, ahik, eß to sosoe suk voh non e Jon vëh to nö voh en maß. 15Eöm o teß varih to teß me nem a tenëneöm, eöm se pënton a soe vaßih!
16“Köß se poß vëknöm vah va in a taateß pa napan vakuru nih, eöß se nok ataeah to vëknöm non rapoë? Ee to teß hutët e ne po siß koaß varih o pëpënton varo, to ihoß ne pa ma ö totoaan, pare vavaasis piu ne, ivëhkëk, o meoh upöm pee to hikta vaëhëh ne. Kee varek ke raoe, pare soe pan,
17‘Emöm to piu kem peöm po piu,
ivëhkëk, eöm to hikta pinoß.
Kemöm vaëhëh kem peöm pa tah okook vatamak,
ivëhkëk, eöm to hikta tamak to ook.’”
18E Ieesuß to toto avoeß e non, pareß soe pan, “E Jon Tövapupui to nö voh maß, pareß hikta ënëën vörep non, ko hikta kakaak voaën non, vamanih po upöm teß. Ivëhkëk, o upöm teß to sosoe ne pan, ‘A oraß hat to teß non manih peß.’ 19Eöß e Koaß Teß Pa Napan Kurus to nö voh maß, paröß ënëën e noß, ko kakaak e noß. Ka napan soe ee pan, ‘Ep këk öm pa teß vëh, eß a pah ënëën vörep, pareß kakaak voaën suntan. Ke eß e vamomhë pa nap kokon takis, me ra napan va pa nok a ma taateß hat.’ Ivëhkëk, a napan to vavatet ne o nat vih pe Sosoenën, eße to vataare e ne pa taateß vih, eß o nat vih rakah, suk eße to vaman ne e Sosoenën.”
Varenan Rakah Pa Napan Varih To Hikta Panih A Ma Taateß Pee
Luk 10:13-15
20E Ieesuß to vavaato avoeß e non, pareß soe vakis rakah ken pee pan, “Varenan rakah pa napan va pa ma vöön apaßpuh varih nöß to nok a ma tah vatoksean peo nën. Suk ataeah, ee to hikta panih voh a ma kokoman pee, pare vahik a nok vatëh a ma taateß hat. 21Varenan rakah peöm a napan va pa poa vöön varih Korasin, me Bëtsaëtaß. A ma tah vatoksean varih nöß to nok voh topniineöm se keh tanok voh pa napan va pa poa vöön varih Taëaß, me Saëdon, a, a napan poë varih se voh panih vahik voh ee pa ma taateß hat pee. Ee se voh ohop a ma ohop tatasi, pare vauh o ö to vataare non a ö nee to tamak ne a ma taateß hat pee. Ivëhkëk, ee hikta panih a ma taateß hat pee. 22Eöß to soe vaman rakah keoß peöm, amot po poen ne Sosoenën se kiiki non a ma napan, a punis va Saëdon, me Taëaß hikta se teß apuh va non manih pa teß punis vëh nöm se taum, suk eöm to ep voh em pa ma vëknöm nöß to nonok voh noß topniineöm, ivëhkëk, eöm to hikta panih, ko vaman. 23Ke eöm varih a napan va pa vöön vëh Kapaneam! Eöm se nat nem koman nem pan, e Sosoenën se ta a no neöm, suk eöm to ep voh e nem peöß, ko pënton voh e nem peöß. Ivëhpëhkëk, eß se vi a neöm po suraß ësës tamoaan. Suk a ma tah vatoksean varih nöß to nok voh topniineöm se keh tanok voh manih Södom, a napan va pa vöön pamëh to hikta se nonok vatëh ne a ma taateß hat. Ka kuru vaßih no a vöön pamëh se teß non a vöön apuh rakah. 24Ivëhkëk, eöß to soe keoß peöm, manih po poen no a napan se tavus manih po vahutët apuh pe Sosoenën, a punis vëh to tavus voh manih pa vöön vëh Södom, to hikta teß apuh va non manih pa teß punis vëh nöm se taum.”Eöm Se Nö Maß Peöß, Paröm Vanot
Luk 10:21-22
25Manih po poen pamëh ne Ieesuß to soe pan, “Tamön, eën e Sunön va pa vöön va kin me po oeh! Eöß to vaeö rakah me nös oah, suk eën to koaan voh a ma tah varih manih pa nap natnat, me a nap natsean va po oeh. Ivëhkëk, eën to vataare eom peß po teß to teß va ne manih po siß koaß. 26Tamön, a ta vaßih to tanok, to suk e non po iu me o manin koman pën.”27E Ieesuß to hin vahik en, pareß tarih maß manih pa napan varih to pënton ne poë, pareß soe pan, “E Tamön to heß voh en peöß pa ma moeh tah kurus. Ka hikta teß to nat non pe Koaß, e Taman varoe to nat non. Me a hikta teß to nat non pe Tamön, e Koaß varoe, me ro teß varih ne Koaß to iu vataare non raoe e Tamön, eße me to nat e ne pe Tamön.”
28“Eöm varih a napan to kamis rakah nem sih pa teß a ma vu punis, eöm se nö maß peöß, köß sih heß a neöm o vanot. 29Öt öm o vavaasis peöß, paröm kon o nat peöß, suk eöß a teß kamöß, paröß teß noß paan a Tuvuh Vasioß. Suk ataeah, eöß to vöknah noß sih o iu peöß, ko hikta se heß punis a noß neöm, köm taum em po vanot. 30Ko vavaasis nöß to heß a neöm, eß o tö rakah pa kon, ka teen nöß to heß a neöm, nöm se teß, to parin are rakah.”
Copyright information for
TPZ